Ganashi record di CBCS a bini principalmente pa inversionnan

WILLEMSTAD – Centrale Bank van Curaçao en Sint Maarten (CBCS) a registra un ganashi record di casi 67 miyon florin den 2025. Segun e informe anual, e resultado tabata impulsa principalmente pa ganashi riba inversionnan, y no pa un mehoracion general den e operacionnan di e banco. Asina e portal curacao.nu ta raporta. Aunke e banco a logra exito cu introduccion di e florin Caribe y modernisacion di e sistema di pago, e informe ta mustra cu gastonan regular a subi, incluyendo gastonan di personal, administracion y automatizacion. Ademas, ingreso netto di interes a baha paso gastonan di interes a casi dobla.

Parti di e ganashi tambe a resulta di recuperacion di placa cu anteriormente tabata considera perdido. Di e ganashi total, casi 52 miyon florin ta correspondi na Corsou y casi 15 miyon florin na Sint Maarten, pero 15 miyon florin lo wordo transferi na Ennia Resolution Fund.

CBCS a considera e cambio exitoso pa e florin Caribe como otro logro importante. Na final di 2025, e cantidad di biljetenan y moneda di florin Antiano den circulacion a baha cu 78%, mientras cu na maart 2026 esaki a yega 80%. E biljetenan y monedanan bieuw por ainda wordo cambia te maart 2055.