Corte ta confirma retiro di funcionario di DIP cu a faborece famia

ORANJESTAD – Raad van Beroep den Asuntonan di Funcionario a confirma e retiro inmediato di un ex-empleado di Directie Infrastructuur y Planning (DIP), despues cu a conclui cu el a abusa di su cargo y a faborece miembro di su famia durante e asignacion di tereno di gobierno. 

Segun corte, e funcionario a participa den procesonan relaciona cu tereno cu finalmente a wordo asigna na su yiu muhe y un otro familiar, aunke nan no tabata cumpli cu e condicionnan di residencia. E tambe no a controla cu reglamentonan importante a wordo cumpli y a wordo involucra den uso impropio di un tereno cu tabata destina pa agricultura.

Aunke un acusacion di falsificacion no a keda comproba den apelacion, e corte a determina cu e conflicto di interes, abuso di funcion y violacion di reglamentonan ta forma falta disciplinario grave. P'esey, e retiro cu Gobernador a impone na januari 2025 ta keda definitivo.