Dowers: Seguridad ta guia control di caminda na costa norte

ORANJESTAD – Minister di Husticia Arthur Dowers ta afirma cu seguridad publico ta e motibo principal tras di e decision pa regula e acceso na e caminda patras na costa norte. Den un entrevista cu Noticiacla recientemente riba e tema, el a splica cu e medida ta busca pa garantisa cu Polis, Ambulance y otro servicionan di emergencia semper por yega lihe na e area ora ta necesario.

NO A CONSULTA CU SU MINISTERIO

E minister a confirma tambe na noticiacla cu e decision pa cera e caminda a wordo tuma sin consulta previo cu Ministerio di Husticia, un situacion cu, segun dje, ta lamentabel. 

Dowers a enfatisa cu e area no lo wordo sera completamente. Actividadnan recreativo lo por sigui, pero di un forma mas controla pa evita situacionnan cu por pone seguridad den riesgo.

Segun e minister, e maneho ta bou responsabilidad di Ministerio di Obra Publico y e ruta oficial mester keda habri pa garantisa acceso rapido pa servicionan di emergencia. El a agrega cu, si ta necesario, Ministerio di Husticia lo brinda asesoramento legal adicional, pero cu e prioridad semper lo ta seguridad di comunidad.