Croes ta contesta MEP riba vuelo priva: “Mi no a haci nada robes”

ORANJESTAD – Minister Gerlien Croes a reacciona fuertemente riba Facebook contra fraccion di MEP diamars atardi, despues cu e partido di oposicion a bolbe cuestion’e tocante e vuelo den jet priva cu el a tuma pa Corsou na november di 2025.

Den su reaccion publico, Croes a acusa MEP di ta usa e asunto pa trata di kibra su imagen, mientras cu, segun e, e partido no ta compronde e materia suficientemente.

“Partido MEP tin 9 luna obseciona cu mi y ta pidi mi un recibo cu mi no tin niun deber di duna nan,” Croes a declara. “Nan ta continuamente purba kibra mi imagen, como si fuera mi a haci algo robes.”

INOCENTE 

Croes a mantene cu e no a comete ningun acto robes y a indica cu e gastonan relaciona cu aterisahe na Corsou no ta surpasa Afl. 1.000. Segun e minister, comparti e tipo di gastonan aki ta permiti pa ley. Sinembargo, e declaracion tocante e monto y legalidad ta posicion di Croes mes y no ta acompaña den su publicacion pa documentacion independiente.

DISTINCION

E minister tambe a haci un distincion entre control parlamentario riba placa publico y informacion tocante su gastonan personal.

“MEP ta den Parlamento pa controla placa di pueblo. Desde ki dia ami tin cu duna ‘Evelyn y Rocco’ cuenta di loke mi a paga cu mi placa?” Croes a puntra. Cu e comentario aki, Croes aparentemente ta contesta directamente lider di fraccion di MEP Evelyn Wever-Croes y parlamentario Rocco Tjon, kende durante lunanan a insisti riba prueba di pago, e costo di e vuelo y posible participacion di tercer personanan den e areglo.

POSICION DI MEP

MEP su posicion ta cu Croes a biaha den su calidad di minister pa un compromiso oficial y cu, consecuentemente, Parlamento tin derecho di haya claridad riba e vuelo. E fraccion a recurri tambe na Landsverordening Openbaarheid van Bestuur (LOB) pa solicita informacion. Parlamentario Edgard Vrolijk a declara recientemente cu Croes ainda no a presenta prueba di pago, apesar di un recomendacion di Comision LAR di 10 di juli 2026. Segun Vrolijk, si e minister no contesta dentro di e periodo aplicabel, e parlamentarionan ta considera hiba e asunto pa corte.

CONTESTA ATROBE

Croes a anuncia cu durante e siman aki e lo bolbe contesta e preguntanan di MEP. No obstante, el a anticipa cu e oposicion probablemente lo sigui cu e mesun tema. “Mi no a haci nada robes. Desde dia uno mi a bisa cu partido MEP no ta bai defini mi bida y tampoco intimida mi cu nan weganan politico,” e minister a enfatisa. Finalmente, Croes a lamenta cu e controversia ta sigui domina agenda di oposicion, mientras cu, segun dje, Aruba tin otro asuntonan urgente cu mester atencion.

“Mi tin trabou pa haci pa mi pueblo y tin asina hopi cos pa atende na Aruba, pero parce cu esaki ta keda e prioridad di e politiconan den oposicion,” Croes a conclui.