Aruba Lions Club ta dona Afl. 10.000 na ocho organisacion comunitario

ORANJESTAD – Aruba Lions Club a demonstra di nobo su compromiso cu comunidad door di haci un donacion total di 10.000 florin na ocho organisacion local cu ta traha pa mehora e calidad di bida di personanan den necesidad na Aruba. E entrega di e donacionnan a tuma lugar durante e ceremonia oficial di instalacion di e directiva nobo di Aruba Lions Club.

Segun Aruba Lions Club, e seleccion di e organisacionnan ta sigui e ocho prioridadnan mundial di Lions Clubs International, cu ta enfoca riba salud, bienestar social, medio ambiente y sosten di comunidadnan vulnerable.

E organisacionnan cu a ricibi un aporte ta:

FAVI, pa proyectonan relaciona cu salud visual.

Fundacion Diabetes Aruba, pa conscientisacion y sosten di personanan cu diabetes.

Aruba Conservation Foundation, pa proteccion di naturaleza y medio ambiente.

Koningin Wilhelmina Fonds (KWF), pa sosten personanan afecta pa cancer.

Fundacion pa Nos Comunidad, pa asistencia humanitario.

YMCA Aruba, pa desaroyo y liderazgo di hubentud.

Rode Kruis Aruba, pa preparacion y asistencia durante calamidadnan.

Fundacion Cria Nos Muchanan, pa sostene programa di desayuno escolar pa mucha.

Aruba Lions Club indica cu e donacion ta forma parti di su mision internacional "We Serve", cu ta guia e organisacion den su esfuerzo pa yuda comunidadnan rond mundo. E organisacion tambe a invita comunidad pa sigui pendiente di su siguiente actividadnan di servicio.