Presupuesto 2027 ta introduci un forma nobo di maneha finansas

ORANJESTAD – Gobierno di Aruba a entrega e Ontwerp Begroting 2027 na College Aruba financieel toezicht (CAft) pa conseho, conforme e proseso legal. Despues di ricibi e conseho, e presupuesto lo bai pa Raad van Advies y despues lo wordo entrega na Parlamento di Aruba pa tratamiento.

Segun Minister di Finansa Geoffrey Wever, Presupuesto 2027 ta marca un paso importante den e manera cu gobierno ta prepara y maneha su finansas. Pa prome biaha, e presupuesto ta basa riba un sistema cu ta conecta mas claramente e plannan di gobierno cu e gastonan y e resultadonan cu kier logra.

E sistema nobo mester haci mas facil pa mira con placa publico ta wordo gasta y cua metanan e inversionnan ta sirbi. Tambe e ta duna Parlamento mas informacion pa controla y evalua e uso di recurso publico.

Den e presupuesto nobo, gastonan y entradanan ta wordo presenta di un forma mas cla, loke ta facilita un mihor bista di con gobierno ta distribui su recurso.

Segun e pronosticonan economico, economia di Aruba por crece alrededor di 4,1% na 2027. Gobierno tambe ta spera un saldo financiero positivo di 1%, respetando e normanan financiero cu ta aplicabel.

Minister Wever a indica cu e presupuesto no ta solamente un coleccion di cifra, sino un instrumento pa conecta cada florin cu metanan concreto y un uso mas eficiente di recurso publico.