Rutanan di Frontier Airlines tuma di Spiri Airlines den Caribe por beneficia Aruba

ORANJESTAD – Aruba por beneficia di futuro expansion di Frontier Airlines den Caribe, despues cu e aerolinea a move rapidamente pa tuma ocho ruta den Merca cu anteriormente tabata wordo opera pa Spirit Airlines. Esaki ta segun un analisis publica pa Caribbean Journal.

Frontier a anuncia cu e lo cuminsa opera ocho ruta domestico entre diferente ciudad den Merca, incluyendo Boston, Detroit, Orlando, Fort Lauderdale y Las Vegas. Aunke ningun di e rutanan nobo ta conecta directamente cu Caribe, e movimiento ta crea expectativa cu e compania por amplia su presencia den region.

Pa Aruba, e desaroyo aki ta interesante pasobra Frontier caba ta opera buelonan pa e isla. Ademas, Fort Lauderdale y Orlando ta dos di e aeropuertonan principal di unda hopi turista ta biaha pa Aruba y otro destinacionnan den Caribe.

Segun Caribbean Journal, Spirit Airlines tabata un di e aerolineanan cu a yuda haci viahe pa Caribe mas accesibel cu prijsnan abao. Si e red di Spirit cambia, Frontier por haya oportunidad pa amplia su servicio, incluyendo den Caribe.

Aun no tin ningun anuncio oficial cu Frontier lo habri ruta adicional pa Aruba. Sinembargo, e rapidez cu e aerolinea ta reacciona na oportunidadnan den mercado ta pone e industria turistico den Caribe atento riba su siguiente movimiento.

Pa Aruba, mas competencia entre aerolineanan por traduci den mas opcion di buelo y tarifa mas atractivo pa bishitantenan, algo cu por fortalece e industria turistico di e isla.