Aruba ta lider den crecimiento di turismo for di Suramerica

ORANJESTAD – Aruba ta consolidando su posicion como uno di e destinacionnan di turismo cu ta crece mas liher den Caribe pa bishitantenan for di Suramerica. Esaki ta resulta for di cifranan publica pa Caribbean Tourism Organization (CTO) y publica door di Caribbean Journal.

Segun e informe, Aruba a ricibi 66.160 bishitante for di Suramerica durante e prome tres luna di 2026. Esaki representa un crecemiento di 32,6% compara cu e mes periodo di aña pasa, e aumento mas halto registra pa cualkier destinacion den Caribe for di e mercado suramericano.

E resultado ta confirma cu e strategia di Aruba pa amplia su mercado turistico ta dunando resultado. Aunke Merca, Canada y Europa ta keda e mercadonan principal, Suramerica ta bira un pilar importante pa crecemiento futuro di e industria turistico.

Segun Caribbean Journal, inversionnan den promocion, mihor conectividad aereo y e posicion geografico favorable di Aruba a contribui pa aumenta e atractivo di e isla entre bishitantenan latinoamericano.