Alemania ta uza Aruba como base pa mision humanitario na Venezuela

ORANJESTAD – Aruba ta hunga un rol clave den e asistencia humanitario internacional pa Venezuela, despues cu Alemania a scoge e isla como base logistico pa su operacion di rescate relaciona cu e temblornan na Venezuela. Dos vuelo diario di un Airbus A400M Atlas ta sali for di Aeropuerto Reina Beatrix cu personal medico, ekiponan y asistencia pa e area afecta door di e temblornan.

ARUBA CONTENTO CU E AYUDO

Prome Minister Mike Eman a declara cu Aruba ta orguyoso di e confianza cu Alemania a pone den e isla pa facilita e mision. Durante un bishita na e avion, e delegacion di Gobierno a mira con e A400M a wordo adapta como un hospital aereo cu seis cama di cuido intensivo pa transporta pashent den estado critico. Ademas di facilita e operacion Aleman, Aruba ta sigui procesa peticionnan di otro avion y helicopter cu ta brinda ayudo na Venezuela. Prome Minister Eman tambe a gradici e pueblo Arubano pa e gran muestra di solidaridad y e cantidad di donacionnan colecta pa yuda e pueblo Venezolano.