Venearuba Solidaria ta organiza evento benefico pa brinda ayudo humanitario na Venezuela

ORANJESTAD – Fundacion Venearuba Solidaria, den colaboracion cu Casa del Venezolano, ta organiza un evento benefico awe anochi na Casibari cu e meta di recauda fondo y ayudo humanitario pa e victimanan di e fuerte temblornan cu a sacudi Venezuela.

Directora di fundacion, Grislynn Hernandes, a informa cu, aunque originalmente e actividad tabata plania pa recauda placa pa instala sistema di luz solar den plazanan, despues di e desastre natural nan a dicidi cambia e destino di e fondo pa brinda sosten inmediato na e afectadonan na Venezuela.

Segun Hernandes, e necesidad ta grandi y pa esey e organisacion ta haci un yamada na tur persona cu por contribui. Tambe tin contacto cu personanan cu tin barko pa facilita transporte maritimo di ayudo humanitario rumbo pa Venezuela.

Hernandes a bisa cu den pasado nan ya a logra manda ton di cuminda y otro articulonan di promé necesidad na Venezuela. Awor nan ta spera por coordina un otro cargamento den e dianan cu ta bin.

E directora a gradici Gobierno di Aruba pa habri frontera aereo pa ayudo humanitario y a indica cu ta sperando cu e apoyo internacional lo sigui aumenta pa yuda e pais vecino enfrenta e crisis.

E evento ta cuminsa awe 8:00 di anochi na Casibari, unda tur persona cu kier aporta por haci un donacion. Pa esnan cu no por asisti, tin tambe un urna disponibel na sede di e fundacion.

Venearuba Solidaria ta invita comunidad pa mustra solidaridad cu pueblo Venezolano den un momento di gran necesidad.