Aruba International Regatta ta bolbe Surfside Beach cu su di 16 edicion

ORANJESTAD – Di 10 te 12 di juli, Surfside Beach lo bira e centro di vela den Caribe ora cu Aruba International Regatta ta celebra su di 16 edicion. Durante tres dia, velistanan local, regional y internacional lo competi den diesun diferente clase, mientras e Regatta Village lo ofrece un ambiente di deporte, recreacion y comunidad. E tema di e edicion di e aña aki ta “Let's Set Sail Together – Sports, People and Nature on the Same Team”, resaltando e conexion entre deporte, hende y naturaleza.

FIN DI SIMAN YEN DI ACTIVIDAD

E programa ta cuminsa diabierna 10 di juli cu un anochi di apertura den Regatta Village, unda participante y bishitante por disfruta di inscripcion, networking, snacks y bebida. E competencianan oficial lo sigui diasabra 11 y diadomingo 12 di juli, mientras e fin di siman lo cera cu un gran fiesta musical cu The Originalz. E inscripcion pa participante lo sera diasabra mainta pa 8:30. Pa e edicion aki, Regatta Village lo conta cu un tent mas grandi. Servicio Medico di Emergencia, lifeguardnan y oficialnan di careda for di Corsou lo ta presente pa garantiza un evento sigur y bon organiza.

DIESUN CLASE RIBA AWA

Velistanan lo competi den un amplio variedad di categoria, incluyendo Optimist, SailQube, F11, Beachcats, Sunfish, Laser, Yacht Racing, Cruising, Live Aboard y Multihull. Un atraccion special ta e categoria di Miniatuurboot, organiza den colaboracion cu Stichting Rancho. E competencia aki ta mustra boto tradicional traha na man, un homenaje na e historia rico maritimo di Aruba.

TRADICION CU TA SIGUI CRECE

Presidente di Aruba Regatta Foundation, Rik van der Vaart, a indica cu despues di 16 edicion, e regatta ainda ta basa riba e mesun principio: bon biento, bon compania y un playa caminda tur hende por reuni. “Diesseis edicion despues, e regatta ainda ta funciona riba e mesun idea: bon biento, bon hende y un playa pa bolbe. E Regatta ta uni tur cos huntu, atrobe.”

INSCRIPCION HABRI

Participantenan cu kier tuma parti por inscribi via aruba-regatta.org. Publico tambe ta invita pa bishita Surfside Beach durante henter e fin di siman y sigui e evento den redes social usando #ArubaRegatta2026.

Aruba International Regatta ta wordo organisa pa Aruba Regatta Foundation, un fundacion dedica na promove e deporte di vela y fortalece e comunidad maritimo na Aruba.