Alerta di tsunami no tabata un error; e sistema di respuesta di Aruba ta genera preguntanan

ORANJESTAD - E aviso di posible tsunami cu Pacific Tsunami Warning Center (PTWC) a emiti dia 24 di juni a crea hopi discusion. Hopi persona a considera esaki un “alarma falso”, pasobra finalmente no tabatin ningun ola destructivo. Sinembargo, investigacion di Noticiacla ta mustra cu e conclusion no ta corecto. Segun PTWC mes e, e alerta tabata basa riba e informacion cu tabata disponibel na e momento y tabata un medida preventivo. Diaranson, dos fuerte temblor di tera (“doublet”) di magnitut 7.2 y 7.5 a sacudi costa noord di Venezuela cu solamente algun segundo entre nan. Despues di e temblornan, PTWC, e organismo internacional encarga cu monitor tsunami den Caribe y otro regionnan, a emiti un aviso di posible amenaza di tsunami pa diferente pais, incluyendo Puerto Rico.

Afortunadamente, e alerta a wordo cancela algun tempo despues, pasobra investigacion adicional a confirma cu no tabatin ningun menaza destructivo. Pero esaki no kiermen cu e alerta tabata un error.

E MENAZA TABATA REAL

Un temblor superficial di e magnitud aki ta libera un cantidad enorme di energia. Na e prome momentonan despues di un temblor, cientificonan ainda no sa exactamente ki tipo di movimiento tectonico a causa e evento. P'esei, e protocol internacional ta exigi cu un alerta wordo emiti prome, mientras e analisis ta sigui. Mas despues, e specialista a determina cu e temblornan tabata di tipo strike-slip, esta un movimiento lateral di placanan tectonico, cual generalmente no ta genera un tsunami grandi. Pero e informacion ey no tabata disponibel inmediatamente.

SI A REGISTRA UN TSUNAMI

Sensornan den laman profundo y medidornan na costa a confirma cu un tsunami si a forma, aunke tabata hopi chikito. Cuater stacion di midimento den Caribe a registra olanan entre 2 y 5 centimetro, demasiado chikito pa causa daño. Danki na e red mundial di monitoreo, PTWC y National Tsunami Warning Center di Merca, hunto cu National Weather Service y National Data Buoy Center, a por confirma rapidamente cu e tsunami no tabata peligroso y, pa e motibo ey, e alerta a wordo retira.

PREGUNTA PA ARUBA

E hecho cu no tabatin daño no kiermen cu no tabatin un menaza potencial. Al contrario, ta precisamente e resultado cu tur sistema di alerta kier logra: preveni riesgo sin cu desastre ta ocuri. Esaki ta laga tambe algun preguntanan importante pa Aruba. Si e organismo internacional cu tin e responsabilidad y e experto necesario a emiti un alerta oficial, con Aruba a reacciona?

Mayoria di e paisnan den Caribe a sigui e aviso di PTWC inmediatamente. Segun e director di Servicio Sismologico di Puerto Rico, e protocolo ta claro: ora tin un temblor fuerte na costa, PTWC ta emiti un boletin preventivo y solamente despues di analisa datonan di boeianan y nivel di laman e alerta ta wordo confirma of retira.

E pregunta cu ta keda ta si Aruba tin suficiente fundamentacion cientifico pa aparta for di e evaluacion di PTWC. Y si esey ta e caso, con e evaluacion local ta wordo fundamenta? No lo ta mas prudente sigui e criterio di e experto internacionalnan, mescos cu Aruba, sigui e avisonan di National Hurricane Center durante temporada di horcan?

PREVENI SEMPER TA MIHOR CU LAMENTA

Den situacionnan di emergencia, tempu ta crucial. Spera un ora pa despues comunica si tin peligro of no, no ta e manera mas eficiente di maneha riesgo den 2026. Ademas, den un mundo di open science y open data, hopi di e informacion cientifico ta disponibel publicamente y por wordo verifica door di cualkier persona.

Na final di cuenta, e evento aki ta confirma un principio basico di manejo di desastre: semper ta mihor preveni cu lamenta.