Dikshonario huridico nobo Hulandes- Papiamento a keda presenta

ORANJESTAD - Despues di varios aña di investigacion y trabou intenso, un grupo di experto di Universidad di Corsou a presenta   e Dikshonario hurídiko – Juridisch woordenboek Hulandes–Papiamento oficialmente, un publicacion cu tabata hopi spera door di profesionalnan den sector huridico na Corsou, Boneiro y Aruba.

E obra a wordo desaroya door di Prof. mr. Lodewijk Rogier, prof. dr. Ronald Severing, mr. dr. Annemarie Marchena-Slot, drs. Ithel Brute y Manuel Maduro. E dikshonario bilingue ta contene mas di 2.500 termino huridico na Hulandes y Papiamento, acompaña pa explicacion y traduccion, convirtiendo esaki den un instrumento tanto explicativo como traductivo.

Segun e autornan, e terminonan a wordo selecta cuidadosamente a base di nan uso den ley, hurisprudencia, ciencia huridico, mundo empresarial y administracion publico. Esaki ta haci e dikshonario particularmente util pa hueznan, abogado, fiscal, polis, funcionario di gobierno, douanero, interprete, traductor, studiante di ley, periodista y otro profesional cu ta traha cu terminologia huridico.

E publicacion ta yena un necesidad cu tabata exista pa hopi aña y lo contribui na un uso mas uniforme di termino huridico den Papiamento. Segun conocedornan, e obra por ta un paso importante den e discusion tocante e posicion di Papiamento den e sistema legal. Actualmente, e Landsverordening Officiële Talen di 2003 no ta reconoce Papiamento como idioma pa redacta ley na Aruba, mientras Hulandes ta keda e unico idioma oficial pa legislacion.

E dikshonario ta sigui e ortografia fonologico di Corsou y Boneiro. No obstante, pa usuario na Aruba cu ta uza e ortografia etimologico, e contenido por wordo lesa y adapta sin dificultad.

Un detaye cu a yama atencion durante e presentacion tabata cu no tabatin representante di Facultad di Derecho di Universidad di Aruba ni di Corte presente. Si, algun interprete di Corte a asisti na e acto.

Cu su contenido amplio y calidad academico, e Dikshonario hurídiko – Juridisch woordenboek Hulandes–Papiamento ta representa un aporte significativo pa e desaroyo di Papiamento como idioma di comunicacion huridico y pa un uso mas consistente di nos idioma den contexto di husticia.