Number di morto despues di temblornan na Venezuela ta sigui subi

CARACAS - E cantidad oficial di personanan cu a perde nan bida despues di e dos  temblornan fuerte cu a sacudi Venezuela a subi pa 235. Ademas, mas di 4.300 hende a resulta herida y ta wordo trata den hospitalnan. Autoridadnan ta spera cu e cantidad di morto y heridonan lo sigui subi, pasobra ainda tin hopi persona desapareci y ekiponan di rescate ta sigui busca sobrevivientenan bou di e ruina. Den ciudad di La Guaira, e dolor ta grandi mientras ekiponan di rescate ta recupera cuerpo di victimanan. Famianan y habitantenan ta enfrenta momentonan di profundo tristesa den medio di e destruccion.

AYUDO INTERNACIONAL TA BIRA MAS GRANDI

Cada biaha mas pais ta anuncia ayudo pa Venezuela. Alemania ta manda ekiponan specialisa di rescate pa yuda den e operacionnan di buskeda. Un rescatista Aleman a bisa cu e prome 72 ora despues di un temblor ta decisivo. “Durante e prome 72 ora ainda por salva hopi bida,” e especialista a declara. Mexico tambe ta manda 250 rescatista huntu cu cachonan specialisa pa busca personanan bou di escombronan. Merca a libera 150 miyon dolar pa ayudo humanitario. Ademas, e pais lo manda dos barkonan militar, avionnan y helicopteronan pa duna sosten na e operacionnan di rescate.

HULANDA TAMBE TA OFRECE ASISTENCIA

Hulanda tambe a ofrece ayudo na Venezuela. Minister di Comercio Exterior y Cooperacion pa Desaroyo, Sjoerdsma, a anuncia cu un equipo di Urban Search and Rescue (USAR) lo wordo manda pa e pais. E equipo ta consisti di specialistanan di p.e. bombero, polis y experto den construccion, kende lo yuda den buskeda, rescate y evaluacion di edificionan afecta pa e desastre.