Aruba ta Campeon Latinoamericano Intermediate y ta bai mundial na California

REYNOSA, MEXICO – Aruba a logra un prestacion historico den beisbòl hoben despues cu e ekipo di Intermediate (50/70) a conquista e titulo di Campeon Latinoamericano. Den un final emocionante, Aruba a vence anfitrion Mexico Kelly cu marcador di 11-10, sigurando e ultimo out den un wega cu tabata yen di tension.

COMIENSO

Aruba a cuminza e partido fuerte y tabata dilanti 10-5 durante e cuater inning. Mexico a logra reduci e diferencia den e ultimonan inning, pero e representacion arubiano a mantene su calma y logra sera e partido pa bira campeon di Latinoamerica.

ARUBA A MUSTRA CARACTER

Pa yega na e titulo, Aruba a mustra caracter durante henter e torneo. Despues di un derrota den su prome partido, e ekipo a recupera cu varios victoria importante, incluyendo un triunfo riba Colombia, un victoria contundente riba Mexico Gallos y un emocionante victoria di 8-6 riba Venezuela den semifinal.

LIVERMORE 

Cu e triunfo den e final, Aruba no solamente ta corona Campeon Latinoamericano, sino tambe a clasifica oficialmente pa representa Latinoamerica den e Intermediate (50/70) Baseball World Series, cu lo wordo hunga na Livermore, California, for di 2 te 9 di augustus 2026.

LOGRO GRANDI

E clasificacion ta un logro grandi pa beisbòl arubiano y un reconocimiento pa e talento, disciplina y perseverancia di e hoben deportistanan, e cuerpo tecnico y tur esnan cu a contribui pa e exito.

Awor Aruba lo tin e honor di representa henter Latinoamerica den un escenario mundial, enfrentando e mehor equiponan di hoben beisbòl for di diferente regionnan di mundo.