Fiscal ta pidi 3 aña di prison pa chofer acusa di causa morto di turista y core bay

ORANJESTAD – Ministerio Publico a exigi un castigo di 3 aña di prison y 4 aña sin rijbewijs contra e Colombiano O.D.P. (36), acusa di causa un accidente mortal na december 2025 den Caya Musica, caminda un turista a perde su bida y un otro persona a resulta herida gravemente.

KICO A SOSODE

Segun Fiscal, O.D.P. tabata conduciendo bou influencia di alcohol ora el a dal un mama y su yiu muher cu tabata canando. E mama, L. Wernet, a keda gravemente herida y despues a fayece den hospital. Despues di e impacto, e chofer a laga e lugar di accidente y posteriormente a sconde su vehiculo.

BIDA A CAMBIA PA SEMPER

Durante e audiencia, e yiu muher di e victima, M. Rodriguez, a sigui e caso via videoconferencia. Visiblemente emociona, e la conta con e tragedia a cambia su bida pa semper. Segun  e, el ta sufri di trauma, depression y flashback despues di perde su mama durante loke mester tabata un vacacion na Aruba.

PIDI PORDON

O.D.P. a pidi pordon durante e audiencia y a declara cu nunca tabata su intencion pa causa e tragedia. E la admite cu e la laga e lugar di accidente pasobra tabata den shock y cu posteriormente a sconde e auto. Sinembargo, e la sigui sostene cu e no tabata bou influencia y cu e no por a evita e accidente. Ministerio Publico, sinembargo, ta di opinion cu investigacion, imagennan di camara y declaracionnan di testigonan ta mustra cu e acusado tabata a consumi hopi alcohol promer cu subi auto. Tambe a wordo constata cu e vehiculo tabatin bentanan excesivamente getint y lusnan cu no tabata funcionando correctamente.

ABSOLUCION 

Defensa, lidera door di abogado Carlo, a pidi absolucion. Segun defensa, no tabatin suficiente prueba cientifico pa confirma cu O.D.P. tabata bou influencia di alcohol y e accidente no por a   evita debido na condicionnan di e area unda e peatonnan tabata canando. Hues a anuncia cu sentencia lo wordo pronuncia dia 3 di juli 2026.