Hues ta rechasa demanda di Ducapro contra Hits100FM riba pago pa uso di musica

ORANJESTAD – Corte a rechasa e demanda cu e instancia Ducapro a presenta contra radio emisora Hits100FM (Q-Waves), determinando cu Aruba ainda no tin un marco legal cu ta regula e representacion, cobranza y distribucion di derechonan di autor. Segun e veredicto, den ausencia di un legislacion especifico, no ta razonabel pa exigi cu usuarionan di musica paga na un representante particular di autornan. 

E CASO

Ducapro, cu ta e organisacion cu kier inicia cobransa na nomber di artistanan, ora cu nan cantica wordo toca na un medio,  tabata pidi Corte pa declara cu Hits100FM a actua di forma ilegal door di usa musica sin a paga e remuneracion correspondiente na e organizacion. Segun Ducapro, nan ta autorisa pa otorga permiso pa uso di musica, cobra pa esaki y distribui e entrada na autornan di musica, basa riba un acuerdo cu Buma/Stemra.

HITS100FM

Hits100FM, pa su banda, a confirma cu e emisora ta usa musica cu derecho di autor y cu nan ta dispuesto pa paga e autornan pa e uso aki. Sinembargo, e emisora a expresa duda cu un pago na Ducapro lo ofrece suficiente garantia cu e permiso necesario pa uso di e musica ta efectivamente cubri.

DECISION DI HUEZ

Den su decision, hues a señala cu Buma/Stemra por actua contra usuarionan di musica bou di ley Hulandes, pero cu Aruba no tin actualmente ningun ley cu ta regula e representacion y cobranza di derechonan di autor.  Corte tambe a nota cu e acuerdo entre Ducapro y Buma/Stemra ta stipula cu e representacion no ta exclusivo. Esaki kiermen cu aun si un usuario paga Ducapro, no tin garantia cu e autor di musica of Buma/Stemra mes lo considera cu e permiso necesario a wordo concedi. Segun Corte, sin un base legal cla cu ta defini ken por representa autornan, con por wordo haci cobranza y con e entrada mester wordo distribui, e demanda no por sostene.

RECHASA DEMANDA

Consecuentemente, e demanda di Ducapro a wordo rechasa y e organizacion, hunto cu su abogado mr. David Kock, a wordo ordena pa paga e gastonan di e procedimiento. Director di Hits100FM (Q-Waves), Aldrich Croes, a expresa su gratitud na abogado mr. Gabriela Sjiem Fat pa su defensa den e caso. Croes a indica cu e resultado ta importante no solamente pa su emisora, sino tambe pa otro medio di comunicacion na Aruba. Actualmente, diferente radio emisoranan y canalnan di television ta colaborando pa crea un asociacion comun cu lo representa nan interesnan den e industria audiovisual local.