OM: Si de Meza paga suma proponi, e no ta sospechoso mas

ORANJESTAD – Si parlamentario Mike de Meza paga e suma di placa cu Ministerio Publico a ofrece pa e paga (5 mil florin:red) , e lo no ta sospechoso mas di loke e ta wordo sospecha, y e caso ta keda cla cu un sepot condicional. Si e paga e suma, kier meen cu e accepta e oferta di OM y bay de acuerdo, OM ta cla cu ne. Diaranson merdia OM a informa den un otro relato, cu a ofrece de Meza e opcion pa paga e suma menciona. Pero, no tabata hopi cla, kico exactamente esaki kier men. Y a base di esey, Noticiacla a puntra OM pa mas clarificacion riba e asunto. 

ACUERDO PAFO DI CORTE 

Segun Angela, e acuerdo proponi, ta un acuerdo cu e ta yega na mesa cu OM pa asina regla e caso pafor di Corte. Un di e condicionnan pa bin na remarke pa un ‘Cita cu Fiscal’ ta cu un hende ta admiti. E hende semper tin escogencia: E por dicidi tambe cu e no ta de acuerdo cu loke Fiscal ta bise of ta ofrece y cu e kier of ta prefera pa Huez dicidi. Esey ta su derecho.

PERIODO PA CUMPLI CU NE

Segun Angela, tur hende cu wordo ofreci pa paga un suma, ta haya un periodo pa cumpli. “Tin ta haya 1 luna, tin 2 luna, tin 4. Unabez nan paga, OM ta pone un streep y kita man di nan. Si nan no paga, anto automatisch ta cita nan dilanti Huez”, Angela a finalisa bisando.