OM a ofrece Mike de Meza paga 5 mil florin pa evita persecusion penal

ORANJESTAD - Awe a tuma lugar un asina yama Cita cu Fiscal den e caso yama Mero, den cual e sospechoso y actual parlamentario  Mike de Meza y su esposa mester a responsabilisa nan mes pa delitonan fiscal cometi den e periodo 2009 te 2019.

INVESTIGACION 

E investigacion contra e dos sospechosonan aki a cuminsa despues cu DIMP (Departamento di Belasting) a haci denuncia na Ministerio Publico di, durante e añanan menciona, keda sin yena e aangiftenan di belasting completamente, keda sin yena nan corectamente y keda sin yena nan na tempo. E iregularidadnan a sali na cla durante un investigacion di integridad den cuadro di screening di kandidaat-ministernan na inicio di 2025. Screening di kandidaat-ministernan a wordo fiha den ley na 2021 y ta inclui entre otro un evaluacion di parti di Inspector di Belasting tocante e cumplimento fiscal den e añanan anterior, inclusivamente si tin debenan habri of otro iregularidadnan. 

INVESTIGACION 

E sospecho di un crimen den un investigacion habri ta trece cu ne cu e nominacion di un persona como minister no por sigui su curso. Esaki tabatin consecuencianan grandi pa señor De Meza, cu a pone su mes candidato pa un puesto ministerial den e gabinete actual.

PAGA SUMA 

Ministerio Publico a ofrece awe na señor De Meza pa paga un suma di Afl. 5000 pa evita persecucion penal. Mesun oferta a wordo haci na su esposa. Tur dos sospechoso tin 1 luna di tempo pa cumpli cu e condicion di pago di e suma di placa. Si nan no accepta loke Ministerio Publico ta ofrece nan, e caso penal  -manera ta sucede semper ora un sospechoso keda sin cumpli cu un condicion impone riba dje- lo wordo hiba dilanti hues.