Ministerio di salud ta traha pa fortalece Instituto di Calidad den Cuido di Salud

ORANJESTAD – Ministerio di Salubridad, Asunto Social, Cuido di Adulto Mayor y Maneho di Adiccion a ricibi un rapport cu recomendacionnan pa sigui fortalece y consolida e rol di Kwaliteitsinstituut Gezondheidszorg (KIG) Aruba den supervision y mehoracion di calidad di cuido di salud.

E estudio a wordo prepara pa prof. dr. Patrick Jeurissen y Edwin Brugman cu apoyo tecnico di TWO Hulanda y ta basa riba consulta cu aproximadamente 40 stakeholder y partner relevante den sector di salud.

Segun Ministerio, e recomendacionnan ta enfoca riba fortalecimento institucional di KIG, ampliacion di su capacidad y reforzamento di su posicion independiente pa asina sigui garantisa cuido di calidad pa comunidad Arubano.

Minister Melvin Wyatt-Ras a indica cu e rapport ta brinda un fundeshi importante pa e siguiente fase di desaroyo di e instituto.

“Nos meta ta fortalece KIG, amplia su capacidad y consolida su independencia pa sigui garantisa cuido di calidad pa nos pueblo,” segun e ministra.

Prof. dr. Patrick Jeurissen a destaca cu calidad den cuido di salud ta un prioridad pa tur pais y a elogia e pasonan cu Aruba ta tuma pa crea un fundeshi duradero pa supervision y mehoracion continuo den sector.

Den e periodonan cu ta bin, e rapport lo wordo comparti cu diferente stakeholder pa recogi reaccionnan y determina e siguiente pasonan necesario pa implementa e recomendacionnan.

Ministerio a gradici TWO Hulanda, e expertonan involucra y tur stakeholder cu a contribui na e proceso, y a confirma cu lo sigui traha cu tur partnernan relevante pa fortalece e sistema di calidad den cuido di salud na Aruba.