Noticiacla LIVE ta trata legado di sclabitut y e impacto di movimiento #Kurashi awe nochi

ORANJESTAD – Den e episodio di awe nochi di Noticiacla LIVE, atencion lo centralisa riba un tema historico y social di gran importancia: e legado di sclabitut den Caribe Hulandes y e esfuerzo actual pa mantene e historia bibo pa generacionnan futuro.

Invitadonan especial di e programa ta ser Lucia Beck-Fox, directora pa e parti Caribe di Reino di e Herdenkingscomité Slavernijverleden, y Jefka Alberto, community manager di e mes organizacion.

Durante e conversacion, e invitadonan lo splica dicon e Comité di Konmemoracion Pasado di Sclabitut a wordo funda y cual ta su mision principal. E comité a nace como parti di un esfuerzo mas amplio den Reino Hulandes pa reconoci, documenta y mantene vivo e historia di sclabitut y su impacto riba generacionnan den Caribe y Hulanda.

Un punto central di e entrevista lo ta e tareanan principal di e comité. Entre otro, e organismo ta dedica su mes na organizacion di actividadnan educativo, investigacion historico, conmemoracionnan oficial y proyecto cultural cu ta busca crea mas conocimiento y comprension tocante e pasado colonial y e consecuencianan cu ainda por wordo sinti awe.

Tambe lo tin amplio atencion pa e movimiento #Kurashi, un iniciativa cu ta busca promove conciencia, dialogo y reflexion riba identidad, dignidad y resiliencia den comunidadnan cu a wordo afecta historicamente pa sclabitut. Segun e organizadornan, #Kurashi ta mucho mas cu un campaña; e ta un yamado pa reconoci historia, fortalece conexionnan entre comunidadnan y contribui na un sociedad mas inclusivo y consciente di su pasado.

E programa lo analiza con e movimiento ta busca pa involucra  specialmente e generacion hoben, usando plataforma digital, actividadnan comunitario y proyecto cultural pa mantene e tema relevante y accesibel.

Cu e aniversario di 163 aña desde abolicion di sclabitut acercando, e entrevista lo ofrece un oportunidad unico pa compronde miho e importancia di memoria historico, reconocimiento y dialogo den construccion di un futuro comparti pa tur habitante di Reino Hulandes.

Noticiacla LIVE lo presenta e conversacion cu Lucia Beck-Fox y Jefka Alberto awe nochi, abordando un capitulo importante di nos historia y e papel cu educacion y conciencia ta hunga den e presente.