Tin reglanan nobo pa intercambio di dato personal den Reino Hulandes despues introduccion di BSN

DEN HAAG – Hulanda a introduci   reglanan  nobo pa intercambio di dato personal entre Hulanda, Aruba, Corsou, Sint Maarten y Caribe Hulandes. E cambionan ta relaciona cu introduccion di numero di servicio ciudadano (BSN) riba Boneiru, Saba y Sint Eustatius desde november aña pasa. Ministerio di Asuntonan Interno y Relacionnan di Reino a indica cu e  circular nobo  ta reemplasa un reglamento di 2013 y tin como meta pa evita cu un persona por keda registra simultaneamente den varios registro di poblacion. Desde 11 di november 2025, tur habitante di Boneiru, Saba y Sint Eustatius ta ricibi un BSN. Esaki ta significa cu nan dato personal tambe ta wordo registra den Base di Registro di Persona (BRP) di Hulanda. Segun ministerio, esaki ta haci coordinacion entre registro di poblacion den Reino mas importante cu nunca.

E  reglanan  nobo  ta stipula cu municipio, cuerpo publico y oficinanan di censo mester intercambia dato automaticamente ora un persona muda entre Hulanda, e islanan BES, Aruba, Corsou of Sint Maarten. Ademas, cada persona mester usa solamente un number administrativo. E ministerio a splica cu den practica, e reglanan anterior no semper tabata wordo sigui corectamente, specialmente ora un persona bolbe Reino via un otro pais. Esaki por causa duplicacion den registracionnan. Cu e sistema nobo, informacion tocante mudanza, estado civil y registracionan anterior lo wordo intercambia digitalmente entre diferente administracionnan di poblacion.

Aunke Aruba, Corsou y Sint Maarten lo mantene nan propio registro di poblacion, nan lo mester coordina y comparti dato cu Hulanda y Caribe Hulandes.