Aruba ta amplia colaboracion cu NHL Stenden pa mas oportunidad di estudio pa hobennan Arubiano

ORANJESTAD – Como parti di su agenda oficial na Hulanda, Minister di  Educacion  Gerlien Croes, a fortalece e colaboracion entre Gobierno di Aruba y NHL Stenden University of Applied Sciences pa amplia oportunidadnan academico pa studiantenan Arubiano.

Durante un reunion na Hulanda, despues di un encuentro inicial algun siman pasa na Aruba, Minister Croes y representantenan di NHL Stenden a conversa riba diferente iniciativa den area di educacion superior. E dialogo a enfoca riba posibilidadnan pa amplia ofertanan di estudio, incluyendo minors, y identifica programa nobo cu por wordo introduci na Aruba.

Tambe a discuti con pa sigui fortalece colaboracion cu Universidad di Aruba y otro institutonan educacional local, cu meta di crea mas oportunidad pa hobennan Arubiano sigui un educacion moderno y conecta cu e necesidadnan di mercado laboral.

Durante e bishita, Minister Croes tambe a haya oportunidad pa encontra cu dos studiantenan Arubiano, Andrew y Camron, cu actualmente ta sigui nan estudio na NHL Stenden. E minister a expresa orguyo den nan progreso academico y a destaca importancia di continua inverti den futuro di hobennan di Aruba.

NHL Stenden ta conoci internacionalmente pa su modelo educativo basa riba Design Thinking, cu ta enfoca riba solucion creativo, colaboracion y enseñansa practico pa prepara studiantenan pa e demanda moderno di trabou.

“Nos ta sigui inverti den colaboracionnan strategico cu institutonan internacional pa amplia oportunidadnan pa nos studiantenan. Educacion ta fundamental pa desaroyo sostenibel di Aruba y pa futuro di nos hobennan”, Minister Gerlien Croes a declara.