Wardacosta: Tension entre Venezuela y Merca a afecta seguridad den Caribe y rond di Aruba

WILLEMSTAD – Wardacosta Caribe Hulandes a revela den su informe anual cu e creciente tension entre Venezuela y United States durante 2025 a tin impacto directo riba operacionnan di seguridad den region caribeño. Asina e portal  curacaochronicle ta raporta.  Segun e informe, instabilidad na Venezuela y aumento di actividad militar americano a crea un ambiente di seguridad mas complejo rond di e islanan ABC, incluyendo Aruba, Corsou y St. Maarten.  

Wardacosta a indica cu Merca a amplia significativamente su presencia militar den region por medio di “Operation Southern Spear”, un operacion enfoca riba monitoreo di desaroyonan relaciona cu Venezuela.   Debi na posicion geografico di Corsou y Aruba, relativamente cerca di Venezuela, autoridadnan a considera cu situacion por tabatin consecuencia directo y indirecto pa Reino Hulandes. Ministerionan hulandes manera Defensa y Asuntunan Exterior a sigui e desaroyonan di cerca hunto cu gobiernonan di Aruba, Corsou y St. Maarten.  

Wardacosta a declara cu durante henter 2025 nan a permanece alerta pa posible violacionnan di frontera, movemento di refugiadonan y otro riesgo regional di seguridad, mientras nan tabata sigui cu operacionnan normal di control maritimo y lucha contra criminalidad.  

Apesar di tensionnan regional, Wardacosta a informa cu nan no a observa un aumento grandi den inmigrantenan ilegal cu a yega via laman for di Venezuela durante 2025 

E organisacion tambe a enfatisa cu nan no tabata involvi “den ningun forma” den operacion militar americano Southern Spear.