Farro (ODEA): Escasez di enfermero na Aruba ta un reto serio

ORANJESTAD – Durante un entrevista cu periodista Tito Laclé den programa Noticiacla LIVE, presidente di ODEA, Sharlyn Farro, a laga cla cu Aruba ta enfrenta un escasez serio di enfermeronan, mientras cu e profesion mester hopi dedicacion, disciplina y un vocacion real pa cuida otro hende.

REALIDAD DIFERENTE

Segun Farro, hopi hende tin e percepcion cu cualquiera por bira enfermero, pero e realidad ta diferente. “No tur hende por bira enfermero,” e la enfatisa. “Enfermero no ta solamente un titulo cu bo por yama bo mes. Bo mester studia, gradua y haya e diploma cu ta duna bo e bevoegdheid pa por ehecuta e handelingnan medico cu e profesion ta exigi.”

ENFERMERO TA MAS CU UN STIMACION 

E la splica cu, aunque tur hende por cuida otro den un cierto forma, enfermeria ta mucho mas profundo cu simplemente tin bon intencion. “Tur hende cu stima nan mes y stima otro hende por cuida, pero e profesion aki ta exigi hopi mas. Bo mester tin amor, respeto y disciplina pa trata tur paciente igual, sin importa religion, sexo of background.”

TIN INTERES PERO TAMBE COMPETENCIA LABORAL

Farro a bisa cu interes pa e profesion ainda ta existi entre hobenan, pero cu competencia den mercado laboral a cambia prioridadnan. “Awendia hopi hende, prome cu nan scoge un estudio, ta wak cuanto salario e profesion ta paga. Si nan no mira un salario atractivo, hopi biaha nan no ta sigui e direccion ey.” Aunke e la admiti cu salario den enfermeria por mehora, e la subraya cu satisfaccion personal tambe ta importante. “Si bo compara Aruba cu exterior, naturalmente tin luga caminda nan ta gana mas. Pero tambe tin e satisfaccion di por ayuda hende y biba digno cu e trabou cu bo ta hasi.”

PROFESION EXIGENTE 

Presidente di ODEA a agrega cu hopi hende solamente ta descubri con exigente enfermeria ta ora nan entra den e estudio. “Tin hende cu ta pensa cu e ta algo simpel, pero despues nan ta realiza cu e ta un profesion intelectual, cu un curriculo fuerte y hopi responsabilidad.” Farro a conclui cu enfermeria no ta solamente un trabou, sino un vocacion cu ta exigi tanto preparacion academico como un compromiso humano profundo.