MEP a entrega conseho huridico na Gobernador riba asunto di jet priva y minister Croes

ORANJESTAD – Fraccion di Movimiento Electoral di Pueblo (MEP) a entrega dos conseho huridico na Gobernador di Aruba tocante e biahe controversial di minister Gerlien Croes den un jet priva, argumentando cu e mandatario no tin “ningun salida legal” den e caso.

Segun lider di fraccion, Evelyn Wever-Croes, MEP a recuri na Gobernador despues cu diferente intento den Parlamento pa haya claridad no a produci resultado. Entre e accionnan menciona tabata preguntanan parlamentario, peticionnan pa debate y un solicitud oficial di informacion (LOB-verzoek).

E dos opinionnan huridico, uno local y otro internacional, ta analiza e caso for di perspectiva di leynan di aviacion mericano y normanan local di integridad. Segun e conseho legal mericano, e avion priva  menciona no tabata autorisa pa ehecuta vuelo comercial paga. MEP ta argumenta cu si minister Croes a paga pa e vuelo, esey por constitui un “illegal charter” bou ley mericano.

Na mes momento, e opinion legal local ta indica cu si minister Croes no a paga pa e vuelo, e biahe por wordo considera como un regalo of favor di balor halto, algo cu segun MEP lo por entra den conflicto cu normanan di integridad y transparencia pa mandatarionan publico.

Fraccion di MEP a conclui cu, den nan bista, e situacion ta debilita confianza publico y cu Parlamento no por keda “man crusa” mirando e falta di claridad riba e asunto.