Dolfijn Charlie ta mustra señal positivo y ta sigui lucha pa recupera

MALMOK – Dolfijn “Charlie”, e dolfijn cu a wordo encontra hopi cerca costa di Aruba, ta sigui mustra señalnan positivo den su recuperacion despues di varios dianan di cuido intensivo. Segun e ultimo update di rescatistanan, Charlie awor a wordo hiba pa awa mas hundo y e ta comiendo atrobe desde dialuna anochi. Tambe ta ricibi dos dia mas di antibiotica, cu speranza cu den dos of tres dia e lo haya forza suficiente pa landa libremente bek den laman.

Historia di Charlie a conmove hopi residente y turista na Aruba durante ultimo siman. Tur cos a cuminsa ora un grupo grandi di entre 30 y 40 delfin a aparece cerca di costa di Aruba despues cu nan aparentemente a perde nan ruta normal di migracion. Un di e dolfijnan, despues bautisa “Charlie”, a keda atras y a wordo encontra den estado debil y herida cerca di Sara Quita Beach.

Boluntario y experto di Aruba Marine Mammal Foundation (AMMF), cu apoyo di Aruba Conservation Foundation, a traha 24 ora pa dia pa mantene Charlie bibando. Segun e fundacion, Charlie tabatin un infeccion den su sanger y a wordo trata cu antibiotica mientras boluntarionan tabata literalmente carga y sostene e delfin den awa pa yud’e sigui respire  y recupera forza.

Durante e operacion di rescate, autoridadnan y organizacionnan ambiental a pidi publico pa mantene distancia y evita disturbio, pasobra stress y panic por tabata pone e recuperacion di Charlie den peligro. E area na Malmok unda Charlie ta recuperando a wordo proteha cu boei y control especial pa evita jetski, boto y multitud di hende den cercania.

Caso di Charlie a crea hopi emocion riba social media y den comunidad, mientras residente y turista a sigui e recuperacion casi dia pa dia. AMMF a coregi diferente informacion falso cu tabata circulando online, incluyendo rumor cu Charlie tabata morto of cu e a regresa cune otro dolfijnan. Fundacion a confirma cu Charlie tabata bibo y luchando pa recupera.

Awor cu Charlie ta cuminsa come atrobe y move pa awa mas hundo,  speranza ta creciendo cu e joven dolfijn lo por recupera completamente y finalmente reuni cu su grupo den laman habri.