Refineria: AVP-Futuro ta busca apoyo Hulandes; MEP ta cuestiona e rumbo

ORANJESTAD – Gobierno di Aruba, encabesa pa Prome Minister Mike Eman, a reuni na Den Haag awe cu funcionario Hulandes di Tijdelijke Werkorganisatie (TWO) y Ministerio di Asuntonan Economico di Hulanda pa discuti futuro di e area di ex-refineria na Aruba. Delegacion tabata inclui vice-prome minister Gerlien Croes, minister Geoffrey Wever y minister plenipotenciario Mildred Schwengle.

Segun gobierno, e reunion a enfoca riba cooperacion tecnico, rehabilitacion ambiental y posibilidadnan pa crea un destino economico nobo y sostenible pa e area di refineria. Prome Minister Mike Eman a declara cu e proyecto tin potencial grandi pa diversificacion economico, innovacion y inversion den Aruba, aunke limpiesa y rehabilitacion di e tereno ta presenta reto grandi.

Gobierno ta busca combina conocemento tecnico Hulandes cu experticio local pa desaroya un vision strategico pa e area. Dentro di dos siman, lo tin propuesta concreto y experto Hulandes lo bishita Aruba pa reuni cu stakeholdernan local. Gobierno ta mira e proyecto como uno di importancia crucial pa futuro economico di Aruba.

CRITICA DI MEP

Sin embargo, oposicion di Movimiento Electoral di Pueblo (MEP) a expresa preocupacion riba direccion cu gobierno ta tuma cu e area di refineria. MEP a pone pregunta si Aruba no ta descartando demasiado rapido posibilidadnan relaciona cu industria petrolero, especialmente mirando cambionan geopolitico y creciente demanda mundial pa energia. E partido a argumenta anteriormente cu Aruba mester mantene opcionnan habri y evalua cuidadosamente tur posibilidadnan economico prome di cera definitivamente e capitulo di refinacion.

Mike Eman, sinembargo, a expresa claramento den reciente declaracionnan cu regreso di refineria como industria petrolero ta “exclui totalmente”. Segun e mandatario, Aruba kier enfoca riba energia renovabel, economia limpi y desaroyo sostenible, en vez di bolbe depende di petroleo.

Debate tocante futuro di e ex-refineria ta sigui bira un tema central den discusionnan politico y economico na Aruba, mirando cu e decisionnan cu ta wordo tuma awor por determina direccion economico di e isla pa decenionan binidero.