Turismo ta reinverti den un Aruba mas limpi cu prome Zona di Desperdicio permanente

ORANJESTAD - Minister di Turismo Wendrick Cicilia, a inaugura oficialmente e prome “Zona di Desperdicio” permanente na Barcadera, como parti di un iniciativa pa crea un Aruba mas limpi y sostenibel. E proyecto, financia pa Aruba Tourism Authority (A.T.A.), ta busca reinverti entrada di turismo den mehoracionnan concreto pa comunidad y medio ambiente.

Segun Minister Cicilia, un isla limpi no solamente ta importante pa calidad di bida di residentenan, pero tambe pa industria turistico, pasobra limpiesa ta uno di e principal motibonan pakico turista ta sigui bishita Aruba. E facilidad na Barcadera lo ofrece un punto central pa deposita sushi di cas, materialnan grandi y sushi di hardin den un manera mas practica y organisa.

E proyecto ta sigui despues di experiencia cu “Baki den Bario,” pero cu un solucion mas permanente, eliminando dependencia di calendario di recohe sushi y reduciendo problema di filanan y sushi cu ta keda atras den bario. Gobierno lo haci un evaluacion despues di seis luna pa determina impacto y posible expansion di e sistema.

Minister Cicilia a enfatisa cu infrastructura so no ta suficiente y cu exito di un Aruba limpi ta depende tambe di colaboracion entre gobierno y comunidad.