Yiu di Corsou Randal Corsen ta subi podio di North Sea Jazz pa di diesun vez

WILLEMSTAD – E conocido pianista yiu di Corsou Randal Corsen lo presenta riba diabierna 10 di juli durante edicion di aniversario di North Sea Jazz Festival na Rotterdam. Durante e presentacion, e pianista, compositor y arreglista corsoues lo ta centro di atencion como solista hunto cu Paradox Jazz Orchestra, cu lo interpreta exclusivamente composicionnan y arreglonan propio.

E colaboracion ta bira un encuentro musical entre energia di un bigband y estilo musical antiano y latinoamericano manera salsa, tumba, danzón y merengue.

Corsen anteriormente a subi podio di North Sea Jazz mas di dies biahe. Su prome presentacion na e festival ta data for di 1997, ora cu e la toca den banda di e gitarista corsoues Cedric Dandaré.

Paradox Jazz Orchestra a wordo funda na 2020 pa director y saxofonista Jasper Staps y trompetista Teus Nobel. E ensemble ta enfoca riba interpretacionnan innovador di jazz di bigband.