Carubbian Festival ta bolbe cu anochi di cultura y musica Caribeño na San Nicolas

SAN NICOLAS – Fundacion Carubbian oficialmente a anuncia regreso di Carubbian Festival, cu lo tuma lugar diahuebs 28 di mei 2026 na Carnival Village na San Nicolas. E evento, cu entrada gratis, lo cuminsa for di 7’or di anochi y ta promete un anochi yen di cultura, musica y ambiente Caribeño.

Despues di un relansamento exitoso na november 2025, organizadornan ta bisa cu e edicion di e  aña lo bin cu mas energia ainda, incluyendo presentacionnan di artista local y internacional. Entre e nombre confirma tin Touch of Steel, Ataniro & Band, Groove Masters, DJ Eli y varios sorpresa special.

Como principal artista internacional, festival lo ricibi cantante di soca Mical Teja di Trinidad & Tobago, conoci pa hitnan manera “DNA (No Place Like Home)”, “Last Train” y “Runaway.” Organisacion ta spera cu su presentacion lo atrae hopi amante di musica Caribeño.

Carubbian Festival no solamente ta enfoca riba musica, pero tambe riba celebracion di diversidad Caribeño door di cuminda autentico, arte local, producto artesanal y entretenimiento pa henter famia. Fundacion Carubbian tambe ta invita vendors local pa participa den e actividad.