Eman: Aruba ta buscando colaboracion cu Hulanda pa innovacion y reciclahe sostenible

UTRECHT - Durante un encuentro na Hulanda cu burgemeester di Utrecht, Sharon Dijksma, Prome Minister Mike Eman a discuti oportunidadnan pa fortalece cooperacion den area di sostenibilidad, economia circular y reciclahe.

Den e reunion, a papia tocante con Aruba por beneficia di conocemento y experiencia Hulandes den proseso di desperdicio, reutilisacion y produccion di energia sostenible. Atencion especial a bay na futuro reutilisacion di area industrial di ex-refineria na San Nicolas y e busqueda pa solucionnan moderno pa maneho di sushi.

Tambe a discuti posibilidadnan pa cooperacion regional den Caribe pa enfrenta retonan ambiental y di reciclahe den un forma mas eficiente.

Aruba ta busca move for di modelonan tradicional di maneho di desperdicio y explora con sushi por wordo converti den energia of producto reutilisabel, cu apoyo di tecnologia y experiencia internacional.