Ban Studia y EducationUSA ta guia hobennan Arubiano pa nan futuro academico

ORANJESTAD  - Desde cu oficina di Ban Studia y EducationUSA a habri un luna y mei pasa, hopi studiante a busca informacion y orientacion riba oportunidadnan di estudio local y internacional.

E oficina ta brinda guia personalisa, incluyendo test di interes y conseho riba direccionnan di estudio na Aruba, Hulanda, Merca y otro paisnan. Tambe nan ta participa activamente den presentacionnan na scolnan y eventonan educativo.

Recientemente, grupo di studiante di YNZ Montessori School Aruba a ricibi informacion riba con pa studia na Merca, mientras cu durante “Beroepen Oriëntatiedag” di Colegio San Antonio, Ban Studia y EducationUSA a informa hobennan tocante diferente opcionnan academico y profesional.

Segun minister Gerlien Croes, meta principal ta pa sigui fortalece orientacion academico di hobennan Arubiano y yuda nan tuma decisionnan consciente riba nan futuro.