CJ: Aruba ta entre destinonan mas sigur y barata den temporada di horcan

MIAMI – E temporada oficial di horcan den Caribe ta core for di juni te november, pero expertonan ta enfatisa cu no tur Caribe ta enfrenta e mesun riesgo. Aruba, hunto cu Boneiru y Corsou, ta situa pafo di e tradicional “hurricane belt”, algo cu ta haci e isla uno di e destinacionnan mas seguro durante e temporada di tormenta. Mester bisa cu e parti di e belt, ainda ta wordo debati si. 

Segun e reportahe den Caribbean Journal, Aruba raramente ta haya impacto directo di horcan y, precisamente durante e temporada aki, prijs di vuelo y hotelnan ta baha considerablemente. Diferente vuelo for di Merca ta cai entre 20 y 40 porciento den prijs, especialmente den augustus y september. Pa Aruba, prijsnan di ticket ida y bek regularmente ta rond di 349 dollar.

Expertonan ta señala cu Aruba ta beneficia di tempo relativamente stabiel, beach menos yen, y un experiencia mas trankilo pa turista durante e periodo di temporada abou. E isla tambe ta wordo menciona como un destino ideal pa pareja, buceadornan y amante di playa cu ta busca solo sigur y menos multitud.

E articulo ta menciona cu Aruba su infrastructura turistico fuerte, junto cu proyecto manera Gateway 2030 y conectividad creciente cu aerolineanan internacional, ta sigui fortalece posicion di Aruba como uno di e destinacionnan mas atractivo den Caribe, hasta durante temporada di horcan.

Aunke tin posibilidad di awacero of biento fuerte ocasionalmente, impacto riba Aruba normalmente ta mucho menos severo compara cu destinacionnan manera Puerto Rico, Republica Dominicana of Jamaica, cu ta den centro di e corredor di horcan.