Jetten ta admiti: No a informa Islanan na tempo riba abstencion den resolucion di sclavitud di ONU

WILLEMSTAD – Prome minister hulandes Rob Jetten a reconoce cu coordinacion cu paisnan Caribeño y Surnam  rond di e reciente resolucion di ONU tocante pasado di sclavitud no tabata suficiente. Segun Jetten, e posicion hulandes “no merece un premio di beyeza”.

E prome minister a reacciona durante un bishita na Tula Museum na Corsou, riba e critica cu a surgi despues cu Hulanda a abstene di vota den un sesion di United Nations tocante un resolucion riba comercio transatlantico di sclavonan. Den e resolucion, comercio di esclavonan ta wordo describi como e crimen mas serio contra humanidad den historia.

“Nos no a logra yega na acuerdo cu paisnan di Union Europeo riba texto di e resolucion y pesey nos a abstene di vota,” Jetten a bisa. “Esaki no a wordo comunica claramente di antemano na e seis islanan y Surnam.”

Segun e prome minister, durante su bishita na islanan a wordo duna splicacion tocante posicion hulandes. “Esey a wordo aprecia,” Jetten a bisa.

Na mes momento, e mandatario a enfatisa cu disculpa so no ta suficiente. “Correctamente nos a ofrece disculpa pa papel den pasado di sclavitud y e impacto cu ainda tin awe, pero e no por keda solamente na disculpa,” e la declara. “Nos mester sigui traha hunto y yuda otro.”