Jetten: Redesaroyo di refineria ta ofrece gran oportunidad economico pa Aruba

ORANJESTAD – Na final di su bishita na Aruba, durante e conferencia final na aeropuerto, contestando pregunta di un periodista riba e declaracion haci un dia prome di e intere di Hulanda di kier yuda Aruba redesaroya e tereno di refineria,  Jetten a bolbe expresa apoyo pa e decision di Aruba pa escoge redesaroyo y reutilisacion di e terreno di refineria, describiendo esaki como un paso “sabio y baliente” pa futuro di isla.

Segun Jetten, door di redesaroyo di e area, Aruba por crea oportunidad pa nobo desaroyo economico, casnan y otro proyecto importante pa futuro di pais. E la revela cu ya tin diferente compania hulandes cu ta mustra gran interes pa colabora cu gobierno di Aruba den e proceso.

Premier hulandes a enfatisa cu prome cu por cuminsa cu desaroyo, ta necesario pa haci investigacion profundo riba contaminacion di tera y e trabounan ambiental cu mester wordo ehecuta. Segun  e, Hulanda tin hopi experiencia cu redesaroyo di area industrial grandi y cu e conocimiento aki por wordo comparti cu Aruba.

“Laga e area manera e ta awo ta un desperdicio,” Jetten a comenta, añadiendo cu inversionnan inicial posiblemente lo ta halto, pero cu finalmente e proyecto lo genera gran beneficio economico y social pa Aruba.

Ora a wordo puntra si Hulanda lo contribui financieramente den e costo di redevelopmento, Jetten a responde cu Aruba ainda no a haci un peticion formal pa asistencia financiero. El a expresa admiracion pa mentalidad independiente y orguyoso di Aruba, sugeriendo cu e mes lo kier y por financia esaki, y cu esaki ta parti di e progreso cu isla a logra desde Status Aparte.

Jetten a conclui cu ainda tin hopi potencial pa futuro di Aruba y cu cooperacion entre Aruba y Hulanda por hunga un rol importante den desaroyo di e area den añanan cu ta bin.