Jetten: Hulanda ta prefera si logra consensus cu Staten di Aruba riba ley di HOFA

Jetten: Hulanda ta prefera cu eventual cambio  den HOFA wordo logra den consenso cu staten di Aruba   

ORANJESTAD – Rob Jetten a declara cu Aruba a logra “paso impresionante” den ultimo añanan tocante fortalecemento di su base financiero y economico. Durante e conferencia di prensa na final di su bishita na Aruba diaranson merdia, a surgi e tema di ley di HOFA.  Relaciona cu e discusion riba e nobo ley financiero dentro di Reino, Jetten a enfatisa cu e debate politico ta un asunto cu Parlamento di Aruba mes mester maneha, mientras Hulanda ta sigui e proceso cu interes.

SACRIFICIO DI ARUBA 

Segun Premier hulandes, e sacrificionan cu gobierno y pueblo di Aruba a haci den ultimo añanan a contribui pa crea un economia y gobierno mas fuerte, cu por ofrece mas pa comunidad. E la indica cu e proposicion di ley cu ta wordo discuti actualmente ta crea un   instrument nobo pa cooperacion financiero dentro di Reino y pa mantene finansas publico solido na Aruba.

BENTAHA 

Jetten a expresa cu den su opinion, tin mester di pone mas enfasis riba e posible ventahanan di e ley, incluyendo mihor facilidad pa presta placa y mas capacidad financiero pa Aruba inverti den su futuro y desaroyo economico.

AUTONOMIA 

Na mes momento, e premier hulandes a reconoce e importancia di autonomia di Aruba y a confirma cu gabinete hulandes lo studia cuidadosamente e conseho di Raad van State tocante e ley. E la bisa cu Hulanda semper ta tuma  e opinionnan di Raad van State seriamente y cu posiblemente tin espacio pa adaptacionnan si esaki ta necesario.

Jetten a agrega cu e ta spera cu Parlamento di Aruba tambe  continua debati e tema ampliamente, y cu lo ta algo positivo si tanto coalicion como oposicion  busca un apoyo politico mas amplio. Segun  e, esaki lo contribui na mas  stabilidad y seguridad pa largo plazo pa Aruba.

Finalmente, Jetten a enfatisa cu Hulanda ta prefera cu eventual cambionan den e ley wordo logra den consenso entre gabinete hulandes y Parlamento di Aruba, pa asina mantene cooperacion fuerte dentro di Reino.