Premier Jetten a bishita proyecto “Aima Coa” pa restauracion di naturalesa na Aruba

ORANJESTAD - Durante su bishita oficial na Aruba, Rob Jetten a bishita e area di restauracion natural “Aima Coa” den Arikok National Park. E proyecto, lidera pa Aruba Conservation Foundation, ta enfoca riba reforestacion, restauracion di ecosistema y fortalecemento di biodiversidad na Aruba.

“Aima Coa”, cu den idioma Caquetio ta significa “abundancia”, tin como meta recupera ekilibrio entre naturalesa, tera y comunidad. Durante e encuentro, stakeholdernan y autoridadnan a discuti accionnan pa sostenibilidad den marco di vision “Natuurinclusief Aruba 2050”, incluyendo colaboracion cu Wageningen University & Research.

Un momento importante tabata firma di un acuerdo di cooperacion y un acto simbolico di plantacion di mata, cu Premier Jetten y Mike Eman a participa hunto.

E proyecto ta inclui accionnan manera control di bestianan cu ta cana liber, eliminacion di especienan invasivo, plantacion di mata nativo y mehora di suela y retencion di awa. Gobierno y organisacionnan ambiental ta mira e iniciativa como un paso importante pa crea un ecosistema mas saludabel y sostenibel pa futuro di Aruba.