Rutten ta laga su puesto como entrenador di seleccion di Corsou

WILLEMSTAD – Entrenador di seleccion Fred Rutten a dicidi dialuna di laga su puesto como entrenador di e seleccion nacional di Corsou. Esaki a wordo confirma pa Federashon Futbol Korsou (FFK). Segun Algemeen Dagblad, Dick Advocaat lo tuma cargo di e ekipo. Diamars mainta, federacion lo tene un conferencia di prensa.

Rutten a dicidi di bay despues di combersacion cu presidente di FFK. Aunke cu e mes no tabata e tema principal di discusion, e la saca su propio conclusion. “No mester crea un clima cu ta haci daño na relacionnan profesional sano, tanto den grupo di hungadornan como den staff. P’esey ta mas sabio pa bay. Ademas, tempo ta corre y Corsou mester sigui dilanti. Mi ta lamenta con tur esaki a bay, pero mi ta desea tur hende hopi exito”, segun Rutten.

CONFERENCIA DI PRENSA DIAMARS

FFK a expresa su aprecio pa e forma cu Rutten a tuma su desicion y a enfatisa cu durante henter e proceso, “a wordo actua cuidadosamente, integro y conforme e acuerdonan vigente”. Directiva a reuni dialuna pa discuti e siguiente pasonan. Te ainda, federacion no a confirma oficialmente ken lo bira e nobo entrenador di seleccion.

Diamars mainta entre 10:00 y 11:00 ora, FFK lo tene un conferencia di prensa cu mas splicacion tocante e proceso. Pa momento, e seleccion ainda no lo wordo presenta.