Division na Corsou: sponsor ta stop despues cu federacion rechasa regreso di Dick Advocaat

WILLEMSTAD - Propietario di compania di biahe Corendon, Atilay Uslu, a anuncia den corant Extra cu su compania lo stop despues di Mundial cu patrocinio di seleccion nacional di Corsou.

Uslu a bisa den e corant cu e ta hopi decepciona cu decision di directiva di FFK pa no trece Dick Advocaat bek como entrenador di seleccion nacional di futbol di Corsou.

Uslu, hunto cu grupo di hungadornan di seleccion nacional, kier bay Mundial luna cu ta bin cu Advocaat como entrenador. Pa logra esey, federacion mester a separa cu Fred Rutten, cu a asumi e puesto na februari despues cu Advocaat a retira temporalmente debi na circunstancianan familiar.

Presidente di federacion, Gilbert Martina, a indica diabierna cu e no ta mira beneficio den un cambio asina. Martina kier cu Rutten, y no Advocaat, guia e ekipo durante Mundial. Den fase di grupo, Corsou lo hunga contra Alemania, Ecuador y Costa di Marfil.

Mundial di futbol den Canada, Mexico y Merca lo cuminsa den 34 dia. Prome cu e torneo, Corsou tin aun dos wega amistoso programa: contra Escocia dia 30 di mei na Hampden Park den Glasgow y contra Aruba dia 7 di juni na Willemstad.

Den un declaracion na corant EXTRA, Uslu a confirma cu e lo cumpli cu tur acuerdo financiero cu e  tin cu FFK pa Mundial 2026, pero despues di e torneo, Corendon no lo sigui como principal sosten financiero di seleccion nacional.

Uslu, cu ta biba na Corsou, anteriormente a yuda federacion sali for di serio problema financiero y incluso a garantiza salario di Advocaat y su staf desde cuminsamento di clasificacion pa Mundial 2026.