Megatanker di petroleo crudo ta bolbe Bullenbaai despues di dies aña

WILLEMSTAD - Bullenbaai a ricibi diaranson su prome megatanker di petroleo crudo despues di dies aña. E barco gigante a mara na e facilidatnan di 2BAYS Curaçao y lo carga casi dos miyon bari di petroleo crudo cu despues lo wordo transporta pa destinacionnan manera China, India y Europa.

E ultimo biaha cu Corsou a ricibi un tanker di e grandura aki pa operacionnan petrolero tabata na 2016. Segun 2BAYS y CRU, e regreso di e megatanker ta un paso importante pa economia y sector petrolero di Corsou.

Desde cuminsamento di 2026, Bullenbaai a bolbe activo den almacenamento y transporte di petroleo, incluyendo carga cu ta bini for di Venezuela. E carga actual ta consisti di casi dos miyon bari di petroleo cu anteriormente a wordo hibá pa Corsou.

E megatanker di petroleo crudo ta un di e barco petroleronan mas grandi di mundo, cu un largura entre 300 y 350 meter — comparabel cu tres veld di futbol. E awa profundo na Bullenbaai ta haci e area ideal pa e tipo di barco aki.

Prome cu e tanker a yega, empleado di CRU y contratistanan local a haci mantenimiento extensivo y preparacion na e infrastructura operacional. Personal tambe a ricibi entrenamento adicional pa maneha un barco di e tamaño aki, mientras cu a coordina cu KTK pa sigura suficiente piloto maritimo pa guia e tanker den haf.