CTB ta presenta plan di accion pa turismo na stakeholders

WILLEMSTAD – Curaçao Tourist Board (CTB) a presenta su plan di accion pa desaroyo y maneho di producto na representante di sector publico y priva.

Durante e reunion dia 29 di april, tabatin 46 participante representando 30 organizacion, incluyendo instancianan di gobierno, companianan y ONG’s.

ENFOKE RIBA CALIDAD Y EXPERENCIA

Segun CTB, e enfoke principal ta riba mehora e calidad di oferta turistico, sostenibilidad y fortifica experencianan autentico pa bishitante. E yamado Product Department a splica e prioridadnan pa resto di 2026. Tambe a revisa proyectonan di 2025 y di prome cuartal di 2026.

PROGRAMANAN NOBO Y ENTRENAMENTO

Pa e periodo cu ta bini, tin plan pa introduci e Neighborhood Experiential Tourism Program y amplia e Quality Assurance Program. Ademas, CTB ta pone enfoke riba entrenamento pa sector turistico, cu atencion pa servicio y mehoracion di calidad.

COLABORACION TA CLAVE

Segun e organizacion, colaboracion cu stakeholders ta sigui siendo un parti importante di e estrategia. Cu tipo di reunion aki, CTB ke alinea estrategia, discuti desafio y identifica oportunidadnan nobo. Temanan manera patrimonio, sostenibilidad, infrastructura y seguridad di bishitante ta keda punto importante di atencion.