Presidente di Banco Central Corsou y St Maarten ta renuncia

WILLEMSTAD/ PHILIPSBURG – Banco Central di Corsou y Sint Maarten (CBSC) a anuncia cu su presidente, Richard Doornbosch, lo renuncia di su puesto efectivo 1 di september 2026. E decision a wordo comunica oficialmente den un comunicado di prensa publica dia 24 di april.

Segun e Banco Central, Doornbosch a tuma e decision pa sigui un oportunidad profesional nobo fuera di e organisacion y tambe fuera di Corsou y Sint Maarten. Te cu su salida oficial, e lo continua cumpli cu su responsabilidadnan cu dedicacion total.

E Conseho di Supervison a indica cu procedimiento pa identifica un sucesor adecuado a cuminsa inmediatamente. Na mes momento, e proseso di reclutamento pa e puesto di Director Financiero y Economico ta den un fase avansa, y lo wordo alinea cu e seleccion di un presidente nobo.

Den su reaccion, e Conseho di Supervison a expresa aprecio pa e contribucionnan di Doornbosch durante su mandato. Segun nan, el a aporta cambionan valioso pa e organisacion y a mustra compromiso fuerte cu e desarrollo di e banco.

CBSC ta indica cu mas informacion tocante e nombramentonan nobo lo wordo comunica na un momento apropiado.

E salida di Doornbosch ta marca un cambio importante den liderato di e institucion financiero mas importante pa Corsou y Sint Maarten, cu ta hunga un rol clave den estabilidad economico y supervision bancario den e region.