Corsou ta prepara pakete di alivio pa subida di prijs causa pa tension geopolitico

WILLEMSTAD - Gobierno di Corsou ta trahando riba un pakete di medidanan pa mengua e impacto di subida di prijsnan, causa pa tension geopolitico mundial, manera e situacion na Medio Oriente cu ta afecta prijs di energia. E intencion ta pa presenta e pakete durante un conferencia di prensa riba 30 di april, despues cu termina tur calculacion y deliberacion.

Autoridadnan a reuni cu un “team di crisis” y diferente sector economico pa evalua opcionnan manera fijacion di prijs maximo y subsidio temporal pa esnan cu mas necesita. Ainda no tin desicion final, pero gobierno ta indica cu tin fondo reserva pa ofrece alivio.

Debido cu Corsou ta depende hopi di importacion, especialmente combustibel y producto di consumo, e impacto di desaroyonan internacional ta pesa fuerte riba e comunidad. Gobierno ta apunta pa introduce medidanan concreto pa proteha e gruponan mas vulnerable y stabilisa e situacion economico.