CARMIL, KPA y KIA ta practica de-escalacion durante disturbio civil

ORANJESTAD - Militarnan Arubiano y Corsou (CARMIL) ta entrena e siman aki na Aruba hunto cu e Unidad Movil (ME) di Kuerpo Polisial Aruba (KPA) y e unidad K9 di KIA (Instituto Correccional Aruba). E ehercicio ta enfoca riba actuacion di de-escalacion durante disturbionan civil, tambe conoci como “Beteugelen van Woelingen” (BVW) (supresion di disturbio), y ta prepara e partnernan militar y di seguridad Caribense pa responde na disturbionan di orden publico.

E entrenamiento a tuma luga tanto na Kazerne di Marina Savaneta como na otro sitionan durante e dianan cu a pasa. Riba diahuebs 23 di april, e scenario final di e ehercicio lo tuma luga den e “pueblo bieuw di Esso” cu yama Seroe Colorado. Den un scenario realistico, Gobernador di Aruba ta wordo confronta cu un grupo di manifestantenan cu ta busca pa regla cuenta cu e alcalde di un pueblo. Segun e situacion ta amenaza di escala, asistencia militar ta wordo yama den forma di un peloton di solda. E ehercicio ta consisti di varios sub-scenario den cual e tensionnan entre manifestantenan y autoridadnan ta escala. Durante e scenarionan aki, trupanan di Caribe ta wordo confronta cu violencia creciente. Central den e ehecicio final aki ta de-escalacion y cooperacion cu socionan di seguridad local.

PELOTONNAN DI SUPRESION DI DISTURBIONAN

Como un partner di seguridad relevante pa duna asistencia militar na Aruba, Corsou, Sint Maarten y e islanan BES (Bonaire, Sint Eustatius y Saba), CZMCARIB tin dos peloton di supresion di disturbio entrena na su disposicion. E unidadnan aki ta completamente equipa cu personal di CARMIL y ta desplegable pa sostene orden y seguridad publico. Tanto Corsou como Aruba tin nan propio peloton di BVW y ta practica regularmente diferente scenario. Danki na e tipo di ehecicionan aki, trupanan di Caribe ta keda prepara pa diferente scenario den caso di disturbionan di orden publico.