KPA: Persona deteni cu pistool y sentencia hopi lihe

ORANJESTAD – Diabierna polis a raporta cu diadomingo 29 di maart 2026, Polis di Aruba a detene un homber durante un control, despues cu agentenan a descubre un tas den su vehiculo cu tabata contene un pistool hunto cu municion. E hallazgo a pone un biaha mas na cla e peligro real cu arma ilegal ta representa pa nos comunidad.

E sospechoso, T.S.C., naci na Aruba, a wordo deteni mesora pa violacion di ley di arma di candela. Cuerpo Policial Aruba y Ministerio Publico a actua cu rapidez riba e caso, y diamars 7 di april 2026 e homber a wordo presenta dilanti corte den un proceso di “snelrecht”.

Huez a emiti un sentencia firme: 18 luna di prizon, di cual 6 luna condicional. Ademas, e homber a wordo poni bou supervision como parti di e condicionnan impone.

Autoridadnan ta usa e caso aki como un señal cla: e lucha contra arma ilegal ta serio. Polis y Ministerio Publico ta bolbe enfatisa cu e campaña pa entrega voluntario di arma ilegal ainda ta activo, cu e meta pa duna hende oportunidad di deshaci di nan arma sin persecucion penal.