Sobrevuelo di avionnan di combate: Padrino Lopez ta denuncia intento di intimidacion for di Merca

CARACAS - E ministro di Defensa di Venezuela, Vladimir Padrino Lopez, a denuncia dialuna un intento di intimidacion for di Merca, despues cu avionnan di combate F-18 a haci un sobrevuelo riba e golfo di Venezuela. E hechonan a pasa diamars y a wordo registra door di e servicio di seguimiento di aviacion Flightradar24. Durante un acto conmemorativo pa e 47 aniversario di e Comando di Defensa Aeroespacial Integral, Padrino Lopez a asegura cu e accion di Merca no lo logra debilita e Fuerza Armada Nacional Bolivariana (FANB) ni e pueblo venezolano. “Nos a mira e pretencionnan pa intimidanos, acercando vectornan aereo di e Fuerzas Armadas di Merca na nos costa. Nos aki, cu hopi humildad, ta bisa nan no equiboca cu nos. Nos ta prepara pa defende e pais aki,” e la declara. “Nos tin e capacidad pa reacciona y defende nos espacio aereo. No equiboca y no sigi cu boso wega di operacionnan psicologico, pasobra nos no ta traga esaki ni un poco,” e  a agrega.

Segun Flightradar24, e dos F-18 a drenta pa mas o menos 40 minuut den e espacio aereo riba e awanan di e golfo di Venezuela, mas o menos 160 kilometro nordeste di Maracaibo. E avionnan, di e variante F biplaza, a haci varios maniobra den forma di tirabuzon prome  cu nan a bay nort, te ora cu nan a keda cerca di Aruba, unda ta sospecha cu e portaavion USS Gerald Ford tabata operando, e mas grandi y mas avansa di e Marina di Merca.