DEN HAAG — Minister hulandes di Enseñansa, Cultura y Ciencia, Rianne Letschert, a cancela su bishita di trabao na Sint Maarten, Curaçao y Aruba completamente, apesar cu e partidonan D66, CDA y VVD a logra un acuerdo pa sigui goberna hunto despues di cuater dia di negociacion pa soluciona e crisis di coalicion.
Inicialmente Letschert a pospone su biahe pa un dia, pero awor el a dicidi di cancela e bishita pa por participa den un reunion extraordinario di Conseho di Minister, programa pa diaranson.
E minister tabata programa pa participa den e reunion ministerial di Enseñansa, Cultura y Ciencia di e cuater paisnan di Reino (M4LO) na Sint Maarten. Apesar di su ausencia, Hulanda lo participa den e reunion via un delegacion di funcionarionan cu autorizacion pa representa e pais.
Despues di Sint Maarten, Letschert lo a sigui pa Curaçao y Aruba, pero ambos bishita a wordo cancela. Ainda no ta conoci si nan lo wordo programa di nobo.
Mientrastanto, e Kingdom Summit na Sint Maarten ta sigui segun programa, pero sin participacion di Premier hulandes Rob Jetten. Secretario di Estado pa Relacionnan den Reino, Eric van der Burg, lo representa Hulanda.
E cancelacionnan ta mustra cu, apesar di e acuerdo pa mantene e coalicion, e situacion politico na Den Haag ainda ta afecta compromisonan di gobierno hulandes den Caribe.