ORANJESTAD — Un total di 300 studiante di EPB Hato, EPB San Nicolas y Mon Plaisir College a participa den un mainta informativo na Gloria Movies, organisa pa Stichting Hunto y Directie Volksgezondheid (DVG) como parti di programa Breaking the Silence.
Durante e actividad, Keanu Maduro y CJ Erasmus a informa e hobenan tocante e riesgonan di vaping, incluyendo e efecto di nicotina riba salud. Angela Persad di Pronad a trata e peligronan di internet, specialmente online grooming, y a enfatisa importancia di busca ayudo cerca di un adulto di confiansa ora algo preocupante pasa online.
E studiantenan a tende tambe dos testimonio personal. Ishon Boekhoudt a comparti su experiencia di bida den un gang y con el a logra sali, mientras Michael Scott a conta di su pasado relaciona cu abandono di scol y uzo di substancia, y con el a logra cambia su bida.
E actividad a duna e hobenan oportunidad pa haci pregunta, comparti nan opinion y reflexiona riba nan decisionnan. Stichting Hunto a gradici e scolnan, presentadornan y DVG pa nan colaboracion.