Aruba a lanta cu inundacion y falta di coriente pa mal tempo

ORANJESTAD — Aruba a lanta diadomingo cu hopi area inunda y varios bario sin coriente, despues cu mal tempo durante marduga y mainta a afecta e isla. Cuerpo Policial Aruba (KPA) a informa cu e area di San Nicolas a wordo mas afecta, mientras cu N.V. ELMAR ta reporta cu lamper a dal riba liñanan di voltahe halto, causando interupcion den suministro di electricidad na varios parti di Aruba.

EVITA CAMINDANAN INUNDA 

Polis ta suplica comunidad pa evita uza e camindanan di Pastoor Hendrickstraat, Zeewijk, Bernhardstraat, Savaneta y e parti patras di Pos Chikito. E aviso ta bin mientras cu e mal tempo ta sigui causa dificultad den e areanan afecta.

CORIENTE 

ELMAR a informa 6:49 di mainta cu un bario na Savaneta y un bario na Cura Cabay tabata sin coriente. Mas despues, , e compania a agrega cu Rooi Afo y un parti di Dakota tambe tabata confrontando interupcion debi na lamper cu a dal riba liñanan di voltahe halto. E mesun mal tempo a complica e trabounan pa restablece coriente. Pa 8:01 di mainta, tecniconan tabata caba na e sitio di e interupcion na Yara, Savaneta, pero nan mester a keda na espera te ora e condicionnan permiti nan traha di un manera sigur.

Den su actualizacion di mainta, ELMAR a informa cu su tecniconan tabata posiciona na Zeewijk, Yara y Paradera. Nan a keda na espera debi na e mal tempo, pero na e momento di e aviso, e trabounan di reparacion na Yara a cuminsa.

Pa por reemplasa e fusenan afecta, ELMAR a indica cu lo ta necesario pa desconecta temporalmente henter e liña di voltahe halto “Yara”.

E compania ta enfatisa cu seguridad di su personal y di personanan den e areanan afecta ta prioridad. ELMAR lo sigui informa comunidad tocante progreso di e reparacionnan. Den su actualizacion di 10:11 di mainta, ainda no a indica un ora pa restablecimento completo di coriente.